Д. Серікбаев атындағы Шығыс Қазақстан техникалық университетіне Француз Республикасының Қазақстан Республикасындағы Төтенше және Өкілетті Елшісі Сильван Гиоге ресми сапармен келді. Университет әкімшілігі делегацияны қарсы алып, оқу орнының қызметі, ғылыми жетістіктері мен халықаралық жобалары туралы ақпаратпен бөлісті.
Сапар барысында Елші университеттің негізгі зертханалары мен ғылыми орталықтарымен танысты, олардың қатарында VERITAS үздік тәжірибе орталығы, Қазақ-неміс институты және Smart Engineering орталығы бар. Қонақтарға университеттің инженерлік инновациялар саласындағы заманауи жетістіктері таныстырылды.
Университет басшылығымен өткен кездесуде Шығыс Қазақстан техникалық университеті мен Францияның жоғары оқу орындары арасындағы ынтымақтастықтың келешегі талқыланды. Тараптар атом өнеркәсібіне арналған инженер мамандарын даярлау, ядролық технологиялар саласындағы ғылыми зерттеулер, сондай-ақ экология мен тұрақты даму бағыттарындағы бірлескен бастамаларға ерекше назар аударды.
Кездесу барысында университеттің халықаралық байланыстарды белсенді дамытып келе жатқаны және Université Grenoble Alpes, Université de Haute-Alsace, Université Paris-Saclay сияқты Францияның жетекші жоғары оқу орындарымен стратегиялық әріптестік орнатуға мүдделі екені атап өтілді.
Кездесу қорытындысы бойынша тараптар ынтымақтастықты одан әрі дамытуға, бірлескен білім беру бағдарламаларын, академиялық алмасулар мен жаһандық технологиялық және экологиялық мәселелерді шешуге бағытталған ғылыми жобаларды іске асыруға дайын екендіктерін білдірді.
