3-курс «Механика және металл өңдеу» білім беру бағдарламасының студенттері Шығыс Қазақстан машина жасау зауыты ЖШС кәсіпорнына барды.
Сапардың мақсаты — машина жасау өндірісінің нақты үдерістерімен, металдарды өңдеу технологияларымен және еңбек жағдайларымен практикалық тұрғыда танысу, сондай-ақ кәсіпорын базасында өндірістік тәжірибеден өту және дуальды оқыту мүмкіндіктерін айқындау.
Экскурсия барысында цех басшылары студенттерге кәсіпорын құрылымы мен негізгі технологиялық учаскелерді таныстырды. Білім алушылар өндірістік станоктарда бөлшектерді дайындау үдерісін, соның ішінде сандық бағдарламалық басқаруы (СББ) бар жабдықтардың жұмысын көрді, сондай-ақ шығарылатын дайын өнім үлгілерімен танысты. Зауыт мамандары металл өңдеудің практикалық тәсілдерін көрсетіп, қолданылатын технологияларды түсіндіріп, операцияларды орындаудағы дәлдік пен сапа талаптарын атап өтті.
Кәсіпорын өкілдері қолданылатын жабдықтар, заманауи металл өңдеу технологиялары, өндірістік қауіпсіздік жүйесі және тәжірибеден өтушілер мен болашақ жас мамандарға қойылатын талаптар туралы баяндады.
Кездесу аясында өндірістік тәжірибеден өту, студенттерді зауыттың тәжірибелі қызметкерлері арасынан тәлімгерлерге бекіту және дуальды оқыту арқылы кейін жұмысқа орналасу мүмкіндіктері талқыланды.
Экскурсия студенттерге кәсіби пәндер бойынша алған теориялық білімдерінің нақты өндірістік жағдайда қалай жүзеге асатынын көруге және болашақ кәсіби қызметі туралы нақты түсінік қалыптастыруға мүмкіндік берді.
Осындай көшпелі іс-шаралар университет пен өңірдің өнеркәсіптік кәсіпорындары арасындағы өзара байланысты нығайтып, механика және металл өңдеу саласындағы мамандарды практикаға бағытталған даярлаудың маңызды бөлігі болып табылады.
