2026 жылғы 7–12 мамыр аралығында Д. Серікбаев атындағы ШҚТУ студенттерінің тобы Нюрнберг қаласындағы Technische Hochschule Nürnberg Georg Simon Ohm университетінің базасында ұйымдастырылған OHM Business Campus Week 2026 халықаралық білім беру бағдарламасына қатысты.
Бағдарлама оқу сабақтарын, университеттік ортамен танысуды, мәдени іс-шараларды және Германияның жетекші компанияларына баруды қамтыды.
Бағдарламаның алғашқы күні қатысушылар «Notes of Nürnberg» қалалық экскурсиясы барысында Нюрнбергтің тарихи орталығымен танысып, қаланың мәдени және тарихи ерекшеліктерін тереңірек танып-білуге мүмкіндік алды.
Оқу бағдарламасы халықаралық білім беру бағдарламаларының студенттері мен ШҚТУ оқытушыларының қатысуымен өткен кәсіпкерлік тақырыбындағы бірлескен дәрістен басталды. Сонымен қатар қатысушыларға Ohm University университетінің таныстырылымы өткізілді, International Office өкілдерімен кездесу ұйымдастырылып, кампусқа экскурсия жасалды. Апта бойы студенттер бірлескен сабақтар аясында Innovation Communication, Innovation and Project Management Control, International Management – Germany and the World пәндерін оқып, сондай-ақ Германия және әлемдік деңгейдегі Mergers & Acquisitions мәселелерін талқылады.
Бағдарламада тәжірибеге бағытталған оқытуға ерекше назар аударылды. Студенттер Deutsches Museum Nürnberg / Future Museum музейіне барып, заманауи технологиялық шешімдермен және ғылым мен инновациялардың болашағына қатысты тұжырымдамалармен танысты. Сондай-ақ Штайн қаласындағы Faber-Castell Writing Instruments өндіріс орнына сапар ұйымдастырылып, қатысушылар өндірістік үдерістермен танысты, «Alte Mine» музейін және фирмалық дүкенді аралады.
Сапардың маңызды бөлігінің бірі өңірдің өнеркәсіптік және технологиялық әлеуетін таныстыру болды. Қатысушылар Эрланген қаласындағы Siemens Healthineers MedMuseum музейіне барып, сондай-ақ Siemens AG компаниясының қаржы директоры әрі басқарма мүшесі профессор Dr. Ralf P. Thomas өткізген көшбасшылық тақырыбындағы дәріске қатысты. Бұл іс-шаралар студенттерге халықаралық компанияларды басқару ерекшеліктерін, бизнестегі инновациялардың рөлін және корпоративтік көшбасшылықтың тәжірибелік аспектілерін тереңірек түсінуге мүмкіндік берді.
Академиялық және кәсіби бағдарламадан бөлек, қатысушылар Ohm University студенттері мен оқытушыларымен бейресми ортада қарым-қатынас орнатуға мүмкіндік алды. Бірлескен түскі және кешкі астар, сондай-ақ Wöhrder Wiese саябағындағы қорытынды кездесу мәдениетаралық диалогты дамытуға, жаңа байланыстар орнатуға және серіктестік қатынастарды нығайтуға ықпал етті.
OHM Business Campus Week 2026 бағдарламасына қатысу студенттер үшін құнды білім беру және мәдени тәжірибе болды. Сапар кәсіби көкжиекті кеңейтуге, Германияның жоғары білім беру жүйесімен танысуға, халықаралық компаниялардың жұмысы туралы түсінік алуға және бизнестегі инновациялық тәсілдердің қолданылуын зерделеуге мүмкіндік берді. Сонымен қатар бағдарлама қатысушылардың коммуникативтік, аналитикалық және мәдениетаралық құзыреттерін дамытуға ықпал етті.
