Д. Серікбаев атындағы Шығыс Қазақстан техникалық университетінде цифрландыру және жасанды интеллект жылына арналған «Жасанды интеллект және инновациялар: жаңа сын-қатерлер мен болашақтың инженерлік шешімдері» атты студенттердің, магистранттардың, докторанттардың және жас ғалымдардың XII Халықаралық ғылыми-техникалық конференциясының салтанатты ашылуы мен пленарлық отырысы өтті.
Биыл пленарлық отырыс ерекше әрі барынша тартымды форматта - EKTU Science Talk ток-шоуы түрінде ұйымдастырылды. Бұл жай ғана пікір алмасу емес, ғылым заманауи, жарқын әрі шынайы қызықты сипатта көрініс тапқан нағыз зияткерлік сұхбат болды. Ток-шоу форматы қатысушыларға сарапшылар пікірін тыңдап қана қоймай, уақыт тынысын сезінуге, жаңа технологиялардың ықпалымен әлемнің қаншалықты жылдам өзгеріп жатқанын көруге және жасанды интеллект дәуірінде ғылымның, инженерияның және адамның болашағы қандай болатыны туралы бірге ой толғауға мүмкіндік берді. Ток-шоудың модераторы PhD, қауымдастырылған профессор С.Р. Байгереев болды. Ол кездесуге серпін, тереңдік және ашық пікірталасқа тән ерекше атмосфера сыйлады.
EKTU Science Talk ток-шоуының спикерлері мен қонақтары: С.Ж. Рахметуллина, Басқарма Төрағасы – ректор; З.А. Камасова, «AMANAT» партиясы ШҚО филиалы жанындағы Әйелдер қанатының жетекшісі; Ж.Т. Конурбаева, Басқарма мүшесі – ғылым және инновациялар жөніндегі проректор; Dr. rer. nat. Bettina Andersen, Юстус Либих атындағы Гиссен университеті (Германия) жанындағы Биомедициналық зерттеу орталығының (BFS) директоры; Евгения Якушина, PhD, техникалық директор, стратегиялық бағдарламалар жетекшісі, NMIS білім алмасу жөніндегі бас ғылыми қызметкері (Стратклайд университеті, Ұлыбритания); А.С. Звонцов, «Альфа-Сейфти» ЖШС өнімді басқару жөніндегі менеджері.
Ток-шоуға студияға арнайы шақырылған жас зерттеушілер мен өнертапқыштар ерекше атмосфера сыйлады. Олардың жобалары қазіргі ғылымның қаншалықты көпқырлы, қызықты әрі болашағы зор екенін айқын көрсетті. Бағдарламаға қатысушылар қатарында Қалымбек Ұлан -Д. Серікбаев атындағы Шығыс Қазақстан техникалық университетінің «Есептеу техникасы және бағдарламалық қамтамасыз ету» білім беру бағдарламасының 2-курс студенті, Маштаев Дияр - Өскемен қаласындағы Лев Гумилев атындағы №38 гимназияның 11 «А» сынып оқушысы, Алтынгүл Ақнұр - Д. Серікбаев атындағы ШҚТУ-дың «Көлікті ұйымдастыру, қозғалысы және пайдалану» білім беру бағдарламасының 1-курс студенті, Парубчишина Валерия - Д. Серікбаев атындағы ШҚТУ-дың «Тіршілік қауіпсіздігі және қоршаған ортаны қорғау» білім беру бағдарламасының 4-курс студенті, Ришатұлы Олжас - Д. Серікбаев атындағы ШҚТУ-дың «Көлік машина жасаудағы смарт технологиялар және жасанды интеллект» білім беру бағдарламасының 2-курс студенті, Карайдаров Саняз - Д. Серікбаев атындағы ШҚТУ-дың «Жылу энергетикасы» білім беру бағдарламасының 1-курс докторанты болды.
Бағдарламаның ерекше қонағы AI-Sana роботы болды. Ол көрермендер мен ток-шоу қатысушыларының айрықша қызығушылығын тудырды. Оның сахнаға шығуы кездесудің ең жарқын сәттерінің біріне айналып, бүгінгі таңда жасанды интеллект ғылыми пікірталастардың абстрактілі тақырыбы ғана емес, күнделікті өмірге еніп келе жатқан шынайы құбылыс екенін айқын көрсетті. Роботтың мүмкіндіктері көрсетілгеннен кейін бағдарлама қатысушылары оның әзірлеушісі - «Математика» білім беру бағдарламасының 1-курс магистранты Айдарханов Елжанға сұрақтар қойды. Ол жобаны әзірлеу ерекшеліктері, роботтың жұмыс істеу қағидаттары, функционалдық мүмкіндіктері және AI-Sana орындай алатын міндеттер туралы жан-жақты баяндады.
Ток-шоудың ең тартымды бөліктерінің бірі зал мен жасанды интеллект арасындағы өзіндік сайыс болды. Қатысушылар мен қонақтар сұрақтар қойып, кейін адамның және жасанды интеллектінің жауаптары салыстырылды. Мұндай интерактивті формат аудиторияның зор қызығушылығын туғызып қана қоймай, заманауи зияткерлік жүйелердің артықшылықтарын көруге, сондай-ақ адам ойлауының, түйсігінің және технологиялардың шекарасы туралы ойлануға мүмкіндік берді. Бұл диалог бүгінгі таңда адам мен жасанды интеллект жай ғана қатар өмір сүрмей, өзара белсенді әрекеттесе отырып, ғылым мен білім үшін жаңа көкжиектер ашып жатқанын әсерлі түрде көрсетті.
Кездесу барысында түрлі пікірлер айтылып, қызықты зерттеулер, практикалық әзірлемелер мен батыл идеялар ұсынылды. Алайда ток-шоудың басты қорытындысы - қатысушылардың бәрі бірге маңызды әрі бүгінгі күн үшін аса өзекті сұраққа жауап іздеуге ұмтылуы болды: жасанды интеллект ғылымды қалай өзгертеді?
Іс-шараны қорытындылай келе, Ж.Т. Конурбаева, Басқарма мүшесі – ғылым және инновациялар жөніндегі проректор, барлық спикерлерге мазмұнды әрі шабыттандыратын сөздері үшін алғыс айтып, қатысушыларды номинациялар бойынша марапаттау рәсімін өткізді және жас ғалымдар мен зерттеушілерге жаңа жетістіктер, жарқын идеялар, батыл жаңалықтар мен барлық жобалардың сәтті жүзеге асуын тіледі.
EKTU Science Talk конференцияның жай ғана бір бөлігі емес, ғылым, технология, жастардың қуаты мен болашаққа деген көзқарас тоғысқан, жанды қарым-қатынасқа, шабыт пен зияткерлік ізденіске толы нағыз алаңға айналды.
