Д. Серікбаев атындағы Шығыс Қазақстан техникалық университетінде «Заң мен тәртіп» жобасы аясында студенттермен кездесу өтті. Іс-шара барысында «Есірткіге – жоқ! Есірткісіз болашақ» тақырыбында дәріс ұйымдастырылды. Дәріскерлер ретінде облыс прокурорының көмекшісі, Өскемен қаласы прокуратурасы бөлімінің прокуроры, сондай-ақ Шығыс Қазақстан облыстық «Esbol qory» фронт-офисінің жетекшісі сөз сөйледі.
Кездесу аясында студенттерге есірткіге тәуелді болу немесе болмау жөніндегі саналы таңдау мен әрбір азаматтың өз болашағы үшін жеке жауапкершілігіне арналған тақырыптық бейнеролик көрсетілді. Бейнематериалды тамашалау көтерілген мәселелер бойынша белсенді пікір алмасуға ықпал етті.
Дәріс барысында спикерлер есірткі құралдарын қолдану және тарату салдарынан туындайтын құқықтық және әлеуметтік зардаптарды жан-жақты түсіндіріп, қолданыстағы заңнамада көзделген жауапкершілік шараларына ерекше назар аударды. Сонымен қатар дропперлік, буллинг және интернет-алаяқтық мәселелері қарастырылып, құқыққа қайшы әрекеттерді анықтау және жеке қауіпсіздікті қамтамасыз ету бойынша ұсынымдар берілді.
Іс-шара ашық диалог форматында өтіп, студенттердің заң талаптарын сақтау, салауатты өмір салтын ұстану және саналы шешім қабылдау жөніндегі жауапкершілігін қалыптастыруға бағытталды.
