2026 жылғы 5 мамырда Қазақстанда Lumières қорының ресми ашылу рәсімі өтті. Бұл қор Франция мен Қазақстан университеттері арасындағы тұрақты ынтымақтастықты дамытуға бағытталған жаңа алаң болып табылады.
Салтанатты рәсімге Қазақстан Республикасы Ғылым және жоғары білім вице-министрі Талғат Ешенкулов және Францияның Қазақстандағы Төтенше және Өкілетті Елшісі Сильван Гиоге қатысты.
Lumières қоры академиялық байланыстарды нығайту, екі елдің жоғары оқу орындары арасындағы әріптестікті кеңейту және білім, ғылым мен индустрияны біріктіретін тұрақты экожүйе қалыптастыру мақсатында құрылған. Қор қызметінде қос диплом бағдарламаларын дамытуға, жаңа бірлескен білім беру бастамаларын іске асыруға, сондай-ақ университеттерді стратегиялық салалардағы кәсіпорындармен ықпалдастыруға ерекше назар аударылады.
Қор қызметінің негізгі бағыттарының бірі студенттерді қолдау болады. Францияда білім алуға арналған стипендияларды қаржыландыру үшін қаражат тарту, ең алдымен бакалавриат студенттеріне, сондай-ақ бірлескен университеттік жобаларды дамыту жоспарлануда.
Lumières қоры қызметінің маңызды бөлігі түлектерді жұмысқа орналастыруға жәрдемдесу болады. Франко-қазақстандық сауда-өнеркәсіп палатасымен (CCIFK) және академиялық серіктестермен, оның ішінде Сорбонна-Қазақстан институты мен Maqsut Narikbayev University-мен бірлесіп, жыл сайын бос жұмыс орындары жәрмеңкелерін өткізу және жұмыс берушілермен өзара ынтымақтастықты дамыту жоспарлануда.
Францияның Қазақстандағы Төтенше және Өкілетті Елшісі Сильван Гиогенің шақыруымен ашылу рәсіміне Д. Серікбаев атындағы Шығыс Қазақстан техникалық университетінің өкілдері қатысты. Университет делегациясының қатысуы халықаралық ынтымақтастықты кеңейту мен француз білім беру және ғылыми ұйымдарымен байланыстарды нығайтудың маңызды қадамы болды.
Lumières қорының құрылуы студенттер, оқытушылар мен зерттеушілер үшін жаңа мүмкіндіктер ашып, академиялық ұтқырлықты дамытуға, бірлескен жобаларды іске асыруға және халықаралық еңбек нарығында сұранысқа ие жоғары білікті мамандар даярлауға ықпал етеді.
