Д. Серікбаев атындағы Шығыс Қазақстан техникалық университетінің базасында республикалық «Таза Қазақстан» экологиялық акциясы аясында «Green Minds EKTU: болашақтың экологиялық жобалары» атты мектеп жобалары байқауы өтті. Университет алаңында Өскемен қаласынан, Шығыс Қазақстан облысынан және Абай облысынан келген 7–11 сынып оқушылары бас қосып, өңірдің өзекті экологиялық мәселелеріне арналған ғылыми шешімдерін ұсынды.
Байқауды Жер туралы ғылымдар мектебі, Green Campus жобасының жетекшісі және университеттің Тұрақты даму офисі ұйымдастырды. Байқау комиссиясы бекітілген құрамда жұмыс істеп, жобаларды экологиялық мәселенің өзектілігі, ғылыми негізділігі, шешімдердің жаңашылдығы, университет базасында жүзеге асыру мүмкіндігі және таныстырылым сапасы критерийлері бойынша бағалады.
Байқауға 47 педагогтің жетекшілігімен 106 қатысушыдан барлығы 55 жоба ұсынылды: оның ішінде 7–9 сыныптар санатында 27 жұмыс, 10–11 сыныптар санатында 28 жұмыс.
Жобалар нақты әрі практикалық бағыттарға арналды: өнеркәсіптік аймақтардағы топырақ пен ауаның ауыр металдармен ластануын зерттеу; Өскемен қаласындағы шағын өзендердің жай-күйін талдау; су айдындарындағы микропластикті анықтау және оны тазартуға арналған құрылғылар жасау; Smart City аясында атмосфералық ауа сапасын цифрлық мониторингтеу; қалдықтарды қайта өңдеу және «ақылды» сұрыптау жүйелерін әзірлеу; қалдықтарды қауіпсіз жағуға арналған экологиялық пештер жасау; биопластик пен баламалы материалдарды әзірлеу; Ертіс және Үлбі өзендеріндегі ластаушы заттардың концентрациясын төмендету; автоматтандырылған шағын экожүйелерді, «ақылды» жылыжайларды және экологиялық қалалық шешімдерді енгізу.
Байқау аясында бірқатар мектептерге қалдықтарды бөлек жинауға арналған эко-бокстар табысталды. Бұл университеттің сұрыптау және қайта өңдеу мәдениетін ілгерілетуге қосқан нақты үлесі болды.
Барлық қатысушыларға сертификаттар мен естелік сыйлықтар табысталды. Іс-шараға университеттің әлеуметтік жауапты серіктестері — Согра ЖЭО, «Development Group» ЖШС және «Plasma Science» ЖШС қолдау көрсетіп, мектеп оқушыларына арналған сыйлықтар мен ынталандыру жүлделерін ұсынды.
Байқау қорытындысы бойынша қатысушыларды, педагогтерді, университет өкілдерін және серіктестерді біріктірген салтанатты марапаттау рәсімі өтті. «Green Minds EKTU» байқауы мектеп оқушыларының зерттеушілік дайындығының жоғары деңгейін және өңірдің экологиялық мәселелерін шешуге деген шынайы қызығушылығын көрсетті. ШҚТУ базасында мұндай бастамаларды өткізу университет пен мектептер арасындағы ынтымақтастықты нығайтып, білім, ғылым және практикалық экологиялық шешімдер арқылы тұрақты болашақты қалыптастыруға ықпал етеді.
