Колледжде «Тәрбие — баланың мінез-құлқының негізі» тақырыбында жалпы ата-аналар жиналысы өтті. Жиналысқа ата-аналар, педагогтер және студенттер қатысып, жастарды тәрбиелеу, оқыту және қауіпсіздік мәселелері талқыланды.
Жиналысты оқу-әдістемелік жұмыс жөніндегі директордың орынбасары Самойлова А.В. құттықтау сөзімен ашты. Ол оқу жылының аяқталуға жақын екенін, ал студенттерді алда жауапты кезең — емтихан сессиясы мен қорытынды аттестаттау күтіп тұрғанын атап өтті. Ата-аналарға оқу процесін ұйымдастыру, сабаққа қатысу, академиялық адалдық және емтиханға дайындық кезеңінде студенттерге бірлесіп қолдау көрсетудің маңыздылығы туралы ақпарат берілді. Сонымен қатар жазғы демалыс кезінде, тұрмыста, қоғамдық орындарда және демалыс барысында қауіпсіздік техникасы ережелерін сақтау қажеттілігіне ерекше назар аударылды.
«Қауіпсіздік пен жауапкершілік аумағы» тақырыбы аясында Үлбі полиция бөлімінің аға лейтенанты Дарибаев А.Т. жастар арасындағы құқықбұзушылықтың алдын алу, құқықтық жауапкершілік және қауіпсіз мінез-құлық мәдениетін қалыптастыру туралы баяндады.
Д. Серікбаев атындағы ШҚТУ-дың комплаенс-офицері Мыктыбаев К.А. академиялық адалдық, шынайылық және сыбайлас жемқорлыққа қарсы мәдениет қағидаттарына тоқталып, адамгершілік құндылықтарды тәрбиелеудегі отбасының маңызды рөлін атап өтті.
Педагог-психолог Иманкулова Т.Н. емтиханға дайындық және тапсыру кезеңінде баланы қолдау жолдары туралы ұсынымдар беріп, үрейді күшейтпей, отбасындағы қолайлы психологиялық ахуалдың маңызын ерекше атап өтті.
Жиналыс барысында Қазақстан Республикасының жастар арасында патриотизмді, азаматтық жауапкершілікті және рухани-адамгершілік құндылықтарды қалыптастыруға бағытталған тәрбие саясаты мәселелеріне де ерекше көңіл бөлінді.
Жиналыс ашық әрі сындарлы диалог форматында өтті. Ата-аналар өзекті мәселелерді талқылауға белсенді қатысып, отбасы мен колледждің бірлескен күш-жігері арқылы ғана саналы, жауапты және тәрбиелі ұрпақты қалыптастыруға болатынын тағы бір мәрте дәлелдеді.
