2026 жылғы 17 ақпанда Д. Серікбаев атындағы Шығыс Қазақстан техникалық университетінің (ШҚТУ) базасында International Professional Educator Registry (iPER/iPEER) қатысушыларын марапаттау рәсімі ENTER Network Президенті José Carlos Quadrado қатысуымен өтті. Іс-шара аясында ШҚТУ-дың 29 оқытушысы Global Standards for Professional Educators ENTER Register талаптарын орындағанын растайтын сертификаттар мен төсбелгілер алып, Engineering, Arts and Humanities, сондай-ақ Business, Administration and Law бағыттары бойынша iPER/iPEER тізіліміне енгізілді.
Аталған жетістік Еуропалық одақ (ЕО) қаржыландыратын Erasmus+ Edu-Fusion Network for Sustainable Growth (Edu-Fusion NSG) жобасын (ERASMUS-EDU-2024-CBHE-STRAND-3, Grant Agreement No. 101179805) іске асыру шеңберінде Университеттің оқыту сапасын арттыру және профессор-оқытушылар құрамының құзыреттерін халықаралық деңгейде тануға бағытталған жүйелі жұмысының нәтижесі болып табылады. ШҚТУ бұл жобада негізгі бенефициарлардың бірі ретінде қатысады. Жоба консорциумы Португалия, Испания және Қазақстаннан 11 серіктесті, оның ішінде Қазақстан Республикасы Ғылым және жоғары білім министрлігін біріктіреді. Edu-Fusion NSG білім беру бағдарламаларын жобалау және іске асыруға заманауи тәсілдерді енгізуге, практикалық-бағдарланған оқытуды дамытуға және «университет–индустрия» өзара іс-қимылын нығайтуға бағытталған. Сонымен қатар жоба оқытушыларды халықаралық сертификаттауды, олардың кәсіби өсуін қолдау тетіктерін дамытуды көздейді.
Айта кетейік, оқытушылардың кәсіби құзыреттерін дамыту және халықаралық деңгейде верификациялау инженерлік білім берудің ұлттық моделін әзірлеу мен енгізу және Қазақстан Республикасындағы инженерлік білім беруді дамыту тұжырымдамасы шеңберінде айқындалған міндеттермен тікелей сабақтас. Бұл құжаттар инженерлік кадрларды даярлау сапасын арттыруға, индустриямен байланыстарды нығайтуға және кәсіби сертификаттау жүйесін дамытуға бағытталған.
International Professional Educator Registry (iPER/iPEER) — тіркеу және сертификаттау рәсімдері арқылы қалыптасатын жоғары білім беру саласындағы кәсіби оқытушылардың халықаралық тізілімі. Ол оқыту, ғылыми қызмет және академиялық басқару бағыттарындағы құзыреттердің танылуын және салыстырмалылығын қамтамасыз етіп, оларды халықаралық деңгейде «көрінетін» әрі расталған етеді. ENTER Register педагогикалық, зерттеушілік және басқарушылық/ынталандырушы құзыреттерді біріктіретін стандарттар мен бағалау рубрикаларына сүйенеді, бұл кәсіби деңгейді бірізді әрі ашық талаптар бойынша растауға мүмкіндік береді.
ШҚТУ үшін 29 оқытушының iPER/iPEER тізіліміне енуі университеттің халықаралық беделін нығайтып, өңірдің кадрлық әлеуеті сапасының дәлелді базасын қалыптастырады. Бұл, соның ішінде, инженерлік білім беру бағдарламаларын EUR-ACE® стандарты бойынша халықаралық аккредитациядан өткізуге дайындық және QS World University Rankings рейтингінде ескерілетін көрінімділік пен сенім көрсеткіштерін күшейту тұрғысынан маңызды. Әрбір оқытушы үшін iPER/iPEER мәртебесі оқыту сапасының халықаралық деңгейде мойындалған бенчмаркі болып табылады, академиялық ынтымақтастық пен халықаралық бастамаларға қатысу мүмкіндіктерін кеңейтеді, сондай-ақ үздік білім беру тәжірибелерін университет ішінде таратуға және үздіксіз кәсіби жетілу мәдениетін дамытуға ықпал етеді.
Алдағы уақытта ШҚТУ оқытушылар құзыреттерін халықаралық деңгейде растау тәжірибесін кеңейтуді, ENTER Register стандарттарын ішкі сапаны қамтамасыз ету тетіктеріне ықпалдастыруды және практикалық-бағдарланған оқытуды күшейту мен индустриямен тұрақты әріптестікті дамыту үшін Edu-Fusion NSG жобасында көзделген құралдарды одан әрі жетілдіруді жоспарлап отыр.
