Венгрияның Пакш атом электр станциясында тұрақты атом энергетикасы үшін стратегиялық жоспарлау жөніндегі аймақтық мектеп өз жұмысын бастады. Бұл шараны Халықаралық атом энергиясы агенттігінің (IAEA) INPRO жобасы, Венгрия Үкіметі және Пакш атом электр станциясы ұйымдастырды.
Аймақтық мектептің басты мақсаты – IAEA INPRO жобасы аясында әзірленген аналитикалық тәсілдер мен бағалау құралдарын пайдалана отырып, ұлттық, өңірлік және жаһандық деңгейлерде орнықты ядролық-энергетикалық жүйелерді ұзақ мерзімді стратегиялық жоспарлауға қажетті құзыреттерді қалыптастыру. Бұл бағытта университеттердің оқытушыларының кәсіби біліктілігін арттыру көзделген.
Екі аптаға созылатын бағдарлама аясында IAEA қызметкерлері мен халықаралық сарапшылар дәрістер оқып, техникалық турлар ұйымдастырды. Қатысушылар Пакш-2 атом электр станциясының құрылыс алаңын және жұмыс істеп тұрған Пакш-1 АЭС-ін аралады, топтық жобалар бойынша тәжірибе алмасты.
Осы іс-шараға Әзірбайжан, Армения, Беларусь, Венгрия, Грузия, Қазақстан, Польша, Ресей, Сербия, Словения, Түркия, Өзбекстан және Хорватия елдерінен университеттер мен түрлі ұйымдардың өкілдері қатысты.
Аталмыш мектеп тұрақты атом энергетикасы саласындағы білім мен тәжірибені жетілдіруге және халықаралық ынтымақтастықты нығайтуға бағытталған маңызды қадам болып табылады.
